Starfshópur á vegum Knattspyrnusamband Íslands hefur lagt mat á áhrif breytinga á mótafyrirkomulagi Bestu deildar karla sem tóku gildi árið 2022. Markmið breytinganna voru meðal annars að fjölga leikjum, auka gæði keppninnar, styrkja vörumerki deildarinnar og bæta rekstrarforsendur félaga.

Helstu niðurstöður sýna að breytingarnar hafa í heild skilað jákvæðum áhrifum. Aðsókn og áhugi áhorfenda hefur verið stöðugur eða vaxandi og fjölgun leikja hefur ekki haft neikvæð áhrif á aðsókn á hvern leik. Sérstaklega hefur efri hluti deildarinnar styrkst, þar sem keppni um Íslandsmeistaratitil og Evrópusæti hefur orðið markvissari og spennandi.

Á sama tíma bendir greiningin til þess að áskoranir séu til staðar, einkum í neðri hluta deildarinnar þar sem aðdráttarafl og keppnislegt vægi leikja er ójafnara. Þá hefur einnig komið fram að tímasetningar leikja og miðlun hafa veruleg áhrif á sjónvarpsáhorf, sérstaklega yfir sumarmánuðina.

Niðurstöður spurningakönnunar meðal hagsmunaaðila styðja þessar ályktanir. Meirihluti telur fjölgun leikja jákvæða og að núverandi fyrirkomulag hafi aukið spennu, þó kallað sé eftir ákveðinni fínstillingu, meðal annars hvað varðar jafnvægi heimaleikja og útileikja og aukna hvata í neðri hluta deildarinnar.

Starfshópurinn telur að meginmarkmið breytinganna hafi að stórum hluta náðst og að núverandi fyrirkomulag skapi traustan grunn til áframhaldandi þróunar. Ekki er talin þörf á grundvallarbreytingum að svo stöddu, en lögð er áhersla á markvissar úrbætur, sérstaklega í miðlun, tímasetningum leikja og keppnislegum hvötum innan deildarinnar.

Skýrslu starfshópsins má sjá hér að neðan.