Víkingur R., Stjarnan og Vestri leika seinni leiki sína í fyrstu umferð í Evrópukeppnum félagsliða í vikunni.

Víkingur R. mætir Györi ETO á þriðjudag í Györ í Ungverjalandi. Víkingar unnu fyrri leik liðanna 1-0 á Víkingsvelli. Það lið sem vinnur viðureignina mætir Hapoel Beer-Sheva frá Ísrael í næstu umferð keppninnar, en liðið sem tapar fer niður í Sambandsdeildina og mætir þar KÍ Klaksvík frá Færeyjum eða Atert Bissen frá Lúxemborg í 2. umferð.

Vestri mætir Qarabag frá Aserbaídsjan á fimmtudag á AVIS vellinum í Reykjavík. Vestri tapaði fyrri leik liðanna ytra 0-3. Sigurvegari viðureignarinnar mætir CSKA Sofia frá Búlgaríu eða Derry frá Írlandi í næstu umferð. Það lið sem tapar mætir Glentoran frá Norður Írlandi eða RFS frá Lettlandi.

Stjarnan mætir Víking Götu í Færeyjum á fimmtudag. Fyrri leikur liðanna endaði með 3-1 sigri Stjörnunnar á Samsungvellinum. Það lið sem fer áfram mætir annað hvort Differdange frá Lúxemborg eða Ilves frá Finnlandi í næstu umferð.