Gatorade verður aðalstyrktaraðili bikarkeppni neðri deilda karla í knattspyrnu frá og með keppnistímabilinu 2026.  Gatorade-bikarinn, sem er í samstarfi við vefsíðuna vinsælu Fótbolta.net, er bikarkeppni fyrir lið í 2. deild karla og neðar og gegnir mikilvægu hlutverki í framgangi og uppbyggingu íslenskrar knattspyrnu.

Bikarkeppni neðri deilda karla varð til með tillögu sem var samþykkt á ársþingi KSÍ 2022 og fór keppnin í fyrsta sinn fram árið 2023.  Þátttökurétt eiga þau lið sem leika í 2. og 3. deild karla, liðin tvö sem féllu úr 3. deild árið áður auk liða sem enduðu í 3. til 8. sæti 4. deildar árið áður.

Sigurvegarar í bikarkeppni neðri deilda karla

• ·       2025:  Víkingur Ó.
• ·       2024:  Selfoss
• ·       2023:  Víðir

Keppnin er vettvangur fyrir metnaðarfulla knattspyrnumenn um allt land og hefur Fótbolti.net gert henni góð skil með lifandi umfjöllun sem vakið hefur mikinn áhuga. 

„Það er mikilvægt að styðja við knattspyrnustarfið um allt land.  Bikarkeppni neðri deilda hefur slegið í gegn síðustu ár og það er afar ánægjulegt að fá Gatorade til liðs við okkur og þessa mjög svo áhugaverðu keppni,“ segir Eysteinn Pétur Lárusson, framkvæmdastjóri hjá KSÍ.

„Gatorade, sem er vinsælasti íþróttadrykkur heims, styður íþróttafólk á öllum stigum um allan heim og leggur áherslu á rétta endurheimt með vökva, steinefnum og söltum sem tapast við áreynslu. Við erum stolt af því að ganga til liðs við knattspyrnuhreyfinguna og hlökkum til árangursríks samstarfs,“ segir Jóhannes Felix Jóhannesson, vörumerkjastjóri Gatorade.

„Það er einstaklega skemmtilegt að fylgjast með öflugum liðum og ástríðufullum leikmönnum í neðri deildum og við hlökkum til að halda áfram að segja sögurnar þeirra. Með stuðningi Gatorade verður það enn skemmtilegra verkefni,“ segir Mate Dalmay, framkvæmdastjóri Fótbolta.net.

Samstarf Gatorade, KSÍ og Fótbolta.net um Gatorade-bikarinn miðar að því að efla enn frekar umgjörð keppninnar og auka sýnileika hennar.