UEFA hefur staðfest úthlutun greiðslna til félaga sem taka þátt í Evrópumótum félagsliða kvenna tímabilið 2026/27. Samtals verða 37,7 milljónir evra til úthlutunar til félaga í Meistaradeild kvenna (UEFA Women's Champions League (UWCL)), Evrópubikarnum (UEFA Women's Europa Cup (UWEC)) og í formi samstöðugreiðslna til annarra félaga í efstu deildum kvenna. 

Fleiri tekjumöguleikar fyrir félög 

Samkvæmt dreifibréfi UEFA verður 18,2 milljónum evra úthlutað til félaga sem komast í deildarkeppni Meistaradeildar kvenna (UWCL), 7,7 milljónum evra til félaga í forkeppni UWCL og 5,6 milljónum evra til félaga sem taka þátt í Evrópubikarnum (UWEC). Að auki verða 6,2 milljónir evra greiddar í samstöðugreiðslur til félaga í efstu deildum kvenna sem ekki taka þátt í deildarkeppni UWCL.  

Félög sem taka þátt í forkeppni UWCL munu fá fyrirfram skilgreindar þátttökugreiðslur fyrir hverja umferð auk árangurstengdra bónusgreiðslna. Sambærilegt fyrirkomulag verður í UWEC, þar sem félög fá greiðslur fyrir þátttöku í hverju stigi keppninnar.  

Jákvæð áhrif fyrir íslensk félög 

Fyrir íslensk félög felast helstu tækifærin í auknum tekjum vegna þátttöku í Evrópukeppnum, fleiri mögulegum Evrópuleikjum og nýjum samstöðugreiðslum sem ætlað er að styðja við þróun kvennaknattspyrnunnar.  

UEFA mun úthluta samstöðugreiðslunum til aðildarsambanda sem eiga félag í UWCL og skulu þær síðan renna jafnt til þeirra félaga í efstu deild kvenna sem ekki taka þátt í deildarkeppni UWCL. Fjármunirnir eru sérstaklega ætlaðir til uppbyggingar- og þróunarverkefna hjá félögunum.  

Einnig má gera ráð fyrir að íslensk félög geti notið góðs af sérstökum greiðslum vegna langra ferðalaga eða mótshalds í forkeppnum, enda eru ferðavegalengdir frá Íslandi oft meiri en hjá mörgum öðrum Evrópuþjóðum.  

Mikilvægt skref fyrir kvennaknattspyrnu 

Með þessum breytingum heldur UEFA áfram að auka fjárfestingu í kvennaknattspyrnu og styrkja rekstrargrundvöll félaga um alla Evrópu. Fyrir íslensk félög felast í nýju fyrirkomulagi bæði auknir fjárhagslegir möguleikar og fleiri tækifæri til að taka þátt í alþjóðlegri keppni.  

UEFA tekur þó fram að endanlegar greiðsluupphæðir verði staðfestar síðar þegar uppgjör tekna og kostnaðar keppnanna liggur fyrir og hvetur félög því til að sýna varfærni við gerð fjárhagsáætlana.