KSÍ vekur athygli á því að félagaskiptagluggar fyrir Bestu deildir karla og kvenna, Lengjudeildir karla og kvenna og 2. deild karla loka 29. apríl næstkomandi.
Vakin er athygli á að sérstakt félagaskiptatímabil fyrir innlend félagaskipti í Lengjudeild karla og kvenna og 2. deild karla 2026 er frá 29. apríl til 6. maí 2026.
KSÍ hvetur félög til að ganga frá félagaskiptum tímanlega svo tryggt sé að þau gangi í gegn fyrir lokun gluggans. KSÍ getur í vissum tilfellum gefið út keppnisleyfi eftir lok gluggans en þá þarf að vera búið að skila öllum gögnum og stofna félagaskiptabeiðni fyrir lok gluggans, sbr. gr. 20.4 í reglugerð KSÍ um félagaskipti, samninga og stöðu leikmanna og félaga.
Við skráningu félagaskipta í TMS-kerfið er mikilvægt að öll gögn séu rétt og fullnægjandi, dvalar- og atvinnuleyfi séu klár þegar það á við og afrit af dvalar- og atvinnuleyfum hafi verið sent á netfangið
gudnie@ksi.isSérstaklega er bent á að ef um kaup er að ræða á lokadegi félagaskiptaglugga erlendis frá þarf viðkomandi félag erlendis að staðfesta að allar upplýsingar séu réttar svo hægt sé að senda beiðni af stað. Því er mikilvægt að:
- Allar upplýsingar um kaupverð og skiptingu greiðslna séu rétt uppsettar
- Upplýsingar séu staðfestar af félagi erlendis
- Staða leikmanns hjá fyrra félagi sé rétt skráð (áhugamaður / atvinnumaður)
Félög eru vinsamlegast beðin um að athuga að félagaskiptabeiðnir fyrir leikmenn utan EES verða ekki sendar af stað nema dvalar- og atvinnuleyfi séu klár og afhent skrifstofu KSÍ. Ekki er fullnægjandi að vísa til þess að búið sé að senda umsókn eða að beðið sé eftir svari frá Útlendingastofnun og/eða Vinnumálastofnun.
