UEFA hefur birt upplýsingar um tekjudreifingu vegna UEFA Meistaradeildarinnar, Evrópudeildarinnar, Sambandsdeildarinnar og Ofurbikars UEFA fyrir keppnistímabilið 2026/27. Jafnframt eru kynntar reglur um greiðslur til félaga í undankeppnum og samstöðugreiðslur til félaga sem taka ekki þátt í deildarkeppnum Evrópumótanna.

UEFA gerir ráð fyrir að heildarbrúttótekjur keppnanna verði um 4,4 milljarðar evra á tímabilinu. Af þeirri fjárhæð fara 132 milljónir evra til greiðslna vegna undankeppna, en 308 milljónir evra renna til samstöðugreiðslna til félaga sem taka ekki þátt í deildarkeppnum mótanna.

Greiðslur vegna undankeppna

Félög sem taka þátt í undankeppnum UEFA-keppna fá fasta greiðslu fyrir hverja umferð sem þau leika. Auk þess fá félög sem falla úr Sambandsdeildinni sérstakar brottfallsgreiðslur sem hækka eftir því sem lengra er komið í keppninni. 

Í dreifibréfinu kemur einnig fram að innlendir meistarar sem komast ekki í deildarkeppni Meistaradeildar, Evrópudeildar eða Sambandsdeildar fá sérstaka viðbótargreiðslu að fjárhæð 260 þúsund evrur. 

Samstöðugreiðslur til félaga utan deildarkeppna

UEFA leggur áfram mikla áherslu á að hluti tekna Evrópukeppnanna skili sér til félaga sem ekki taka þátt á lokastigum keppnanna. Samtals verða 7% af heildartekjum keppnanna, eða um 308 milljónir evra, greiddar út í formi samstöðuframlaga í gegnum þjóðarsambönd UEFA. Nánari upplýsingar um úthlutunarreglur verða birtar síðar. 

UEFA hvetur félög til að nýta fjárhagshermi

Samhliða dreifibréfinu minnir UEFA félög á sérstakt fjárhagshermitól sem gerir þeim kleift að meta mögulegar tekjur af þátttöku í Evrópukeppnum út frá mismunandi sviðsmyndum. UEFA bendir þó á að allar fjárhæðir sem birtar eru í dreifibréfinu séu áætlaðar og að endanlegar greiðslur ráðist af raunverulegum tekjum keppnanna. 

KSÍ hefur sent dreifibréfið til aðildarfélaga sinna og hvetur félög til að kynna sér upplýsingarnar vel við gerð fjárhagsáætlana og framtíðaráforma vegna þátttöku í Evrópukeppnum UEFA. 

Athygli er jafnframt vakin á því að móttaka samstöðugreiðslna (solidarity payments) frá UEFA er háð því að félög uppfylli þær kröfur sem UEFA hefur innleitt í áföngum samkvæmt nýju solidarity-kerfi sambandsins. Fyrir tímabilið 2026/27 þurfa félög að uppfylla kröfur Phase 2, auk allra krafna úr Phase 0 og Phase 1. UEFA gerir kröfu um að öll viðeigandi skilyrði séu uppfyllt til að félag teljist greiðsluhæft samkvæmt kerfinu.