Þegar íslenska kvennalandsliðið mætir Króatíu á Laugardalsvelli 13. október næstkomandi verður ekki aðeins mikilvægur landsleikur á dagskrá. Fyrir leikinn munum við einnig staldra við og minnast stórra tímamóta í sögu íslenskrar knattspyrnu. 

Árið 2009 tók A landslið kvenna þátt í lokakeppni Evrópumótsins í fyrsta sinn. Það var sögulegur áfangi og afrakstur margra ára vinnu, fórnfýsi og metnaðar leikmanna, þjálfara og starfsfólks. Með því að tryggja Íslandi sæti meðal bestu þjóða Evrópu ruddi þessi hópur brautina fyrir þær kynslóðir sem á eftir komu. 

Það er auðvelt að horfa á þann árangur í dag sem sjálfsagðan hlut. En staðreyndin er sú að hvert skref sem íslensk kvennaknattspyrna hefur tekið á síðustu árum byggir á þeim grunni sem lagður var af þeim sem fóru á undan. Árangur næst ekki í tómarúmi. Hann verður til vegna þess að einhver hafði getu, kjark, elju og trú til að ryðja brautina. 

Af þeirri ástæðu hefur KSÍ boðið leikmönnum og starfsfólki fyrsta EM-hóps Íslands frá árinu 2009 á leikinn gegn Króatíu sem sérstökum heiðursgestum. Fyrir leikinn munu áhorfendur á Laugardalsvelli fá tækifæri til að sýna þessum brautryðjendum þakklæti sitt með verðskulduðu lófataki. 

Það er jafnframt táknrænt að þessi heiðrun fari fram á sama tíma og núverandi landslið stendur frammi fyrir verkefni sem getur reynst eitt það mikilvægasta í sögu liðsins. Sigur gegn Króatíu myndi færa Ísland stóru skrefi nær því markmiði að tryggja sér þátttöku á heimsmeistaramóti kvenna í fyrsta sinn. 

Draumurinn um HM hefur lengi lifað og lifir enn. Ef sá draumur verður að veruleika verður það ekki aðeins afrek núverandi leikmanna og starfsfólks heldur einnig framhald af þeirri vegferð sem hófst fyrir mörgum árum og varð sýnileg öllum þegar Ísland steig í fyrsta sinn inn á svið Evrópumótsins árið 2009. 

Ég vil því hvetja allt knattspyrnuáhugafólk og alla stuðningsmenn íslenska landsliðsins til að fjölmenna á Laugardalsvöll 13. október. Komum saman, heiðrum þær sem ruddu brautina og styðjum um leið við núverandi landslið á leið þess að nýjum sögulegum áfanga. 

Saga íslenskrar kvennaknattspyrnu hefur alltaf verið skrifuð af fólki sem þorði að gera meira en búist var við. Nú gefst okkur öllum tækifæri til að vera hluti af næsta kafla þeirrar sögu. 

Þorvaldur Örlygsson 

Formaður KSÍ