KSÍ og SÁÁ vekja athygli á spilavanda
KSÍ og SÁÁ munu standa saman að verkefni sem ætlað er að vekja athygli á spilavanda og hvetja einstaklinga sem þurfa á því að halda að leita sér viðeigandi aðstoðar.
Framboð veðmálasíðna og notkun veðmála hefur aukist mikið að undanförnu og hafa veðmál og spilavandi verið enn meira áberandi í opinberri umræðu. KSÍ og SÁÁ hefja sameiginlega herferð sem miðar að því að opna umræðuna og vekja athygli á þeim neikvæðu áhrifum sem spilavandi og veðmál geta haft. Með samstarfinu vonast KSÍ og SÁÁ til að rjúfa hindranir og hvetja fleiri til að stíga fyrsta skrefið í að leita sér hjálpar.
Tilgangur SÁÁ er að vinna að því að draga úr skaðlegum áhrifum fíknisjúkdóma á einstaklinga, fjölskyldur og samfélagið í heild. Samtökin stuðla að bættu heilbrigði, lífsgæðum og félagslegum úrræðum með því að veita þjónustu, stuðning og fræðslu. Grunnur herferðarinnar verður að vekja athygli á starfsemi SÁÁ og þeirri þjónustu sem samtökin bjóða upp á fyrir einstaklinga sem glíma við spilavanda.
„Við erum stolt af þessu mikilvæga samstarfi við KSÍ. Samstaða um að vekja athygli á spilavanda getur haft raunveruleg áhrif, ekki síst innan hópa ungra áhugamanna um knattspyrnu“ segir Anna Hildur Guðmundsdóttir, formaður SÁÁ. Þorvaldur Örlygsson, formaður KSÍ bætir við að „Spilavandi er orðinn vaxandi vandamál í okkar samfélagi. Með þessu átaki vonumst við til að geta leitt umræðuna um spilavanda og stuðlað að frekari fræðslu fyrir þá sem þurfa á því að halda. Það er mikilvægt að vekja athygli á því hvert fólk getur leitað eftir hjálp.“
Hægt verður að fylgjast betur með verkefninu þegar fram líða stundir á miðlum KSÍ og SÁÁ, sem vilja leggja áherslu á að allir geti leitað sér hjálpar og ráðgjafar, hvort sem um er að ræða leikmenn, þjálfara, dómara, aðstandendur eða almennt áhugafólk um knattspyrnu.
Þetta verkefni er hluti af sameiginlegu átaki Knattspyrnusambands Íslands (KSÍ), Íslensks Toppfótbolta (ÍTF) og Leikmannasamtaka Íslands (LÍ).
.jpg?proc=760)
