Tveggja marka tap í Laugardalnum gegn Frökkum
A landslið kvenna mætti Frakklandi á Laugardalsvelli í kvöld, í lokaumferð Þjóðadeildar kvenna. Óhætt er að segja að sterkur vindur hafi haft mikil áhrif á leikinn en engu að síður áttu bæði lið góða spilkafla.
Jafnræði var með liðunum í fyrri hálfleik og þrátt fyrir nokkrar öflugar marktilraunir á báða bóga var markalaust þegar flautað var til hálfleiks.
Í síðari hálfleik sótti franska liðið undan vindi og sókn þeirra bar ávöxt á 74. mínútu þegar fyrsta mark leiksins leit dagsins ljós. Þrátt fyrir ágætar tilraunir íslenska liðsins til að jafna leikinn náðu Frakkar að bæta við öðru marki á 85. mínútu. Þar við sat og tveggja marka franskur sigur staðreynd.
Frakkar luku því keppni með fullt hús stiga á toppi riðilsins. Á sama tíma mættust Sviss og Noregur í Sion og vann norska liðið þar eins marks sigur. Þessi úrslit þýða að Norðmenn hafna í 2. sæti riðilsins. Ísland lýkur keppni í þriðja sæti og er því á leið í umspil um fall í B-deild Þjóðadeildarinnar. Sviss hafnar í neðsta sæti og fellur því í B-deild.
