Frábær sigur í síðasta leik fyrir EM
A kvenna vann góðan 3-1 sigur gegn Serbíu í síðasta leik sínum fyrir EM 2025.
Leikurinn fór fram á æfingasvæði serbneska knattspyrnusambandsins þar sem íslenska liðið hefur verið við æfingar alla vikuna við frábærar aðstæður.
Liðið hóf leikinn frábærlega. Sandra María Jessen skoraði fyrsta mark leiksins eftir þrjár mínútur og tæpum tveimur mínutum síðar var Karólína Lea Vilhjálmsdóttir búinn að bæta við öðru marki Íslands.
Sveindís Jane Jónsdóttir skoraði svo algörlega stórbrotið mark á 58. mínútu. Hún fékk boltann á vallarhelmingi Íslands, sneri af sér varnarmann Serba og tók af rás upp völlinn. Þetta hlaup endaði svo með glæsilegu skoti upp í markhornið. Algjörlega óverjandi skot.
Serbía minnkaði muninn þegar rúmlega tuttugu mínútur voru eftir af leiknum eftir góða sókn. Diljá Ýr Zomers var nálægt því að bæta við fjórða markinu seint í leiknum, en skot hennar endaði í slánni.
Góður 3-1 sigur staðreynd og góðum undirbúningi liðsins í Serbíu lokið fyrir ferð þess til Sviss á laugardag.
.jpg?proc=760)
