Birta best og Thelma Karen efnilegust
Í dag, laugardag, fór fram lokaumferðin í Bestu deild kvenna þar sem þrír leikir fóru fram. Breiðablik tók á móti FH og fengu Blikar í leikslok afhentan Íslandsmeistaraskjöldinn og -bikarinn.
Eins og undanfarin ár velja leikmenn í Bestu deildinni besta og efnilegasta leikmann deildarinnar.
Efnilegasti leikmaður Bestu deildar kvenna 2025 er Thelma Karen Pálmadóttir, FH. Thelma Karen lék alla 23 leiki FH í Bestu deildinni í sumar og skoraði 8 mörk.
Besti leikmaður Bestu deildar kvenna 2025 er Birta Georgsdóttir, Breiðabliki. Birta lék 21 leik fyrir Blika og skoraði í þeim 18 mörk.
Það hefur verið fastur liður í lok móta að afhenda leikmönnum sem skara fram úr í efstu deild kvenna „Flugleiðahornin“ svokölluðu. Það var Þorvaldur Örlygsson formaður KSÍ sem afhenti þeim Birtu og Thelmu þessa frægu verðlaunagripi að loknum leik Breiðabliks og FH í dag.
.png?proc=760){kind=logo}
