Tveggja marka sigur í Ballymena
A landslið kvenna vann í kvöld góðan tveggja marka sigur á Norður-Írlandi á Ballymena Showgrounds í nágrenni Belfast. Um var að ræða fyrri leik liðanna í tveggja leikja umspili um sæti í Þjóðadeild A og liðin mætast að nýju á Laugardalsvelli á þriðjudag.
Íslenska liðið var sterkari aðilinn allan leikinn og sigurinn var nokkuð þægilegur. Bæði mörkin voru skoruð með skalla eftir fast leikatriði. Fyrra markið skoraði fyrirliðinn Glódís Perla Viggósdóttir á 31. minútu eftir aukaspyrnu frá Karólínu Leu Vilhjálmsdóttur og seinna markið skoraði Ingibjörg Sigurðardóttir eftir hornspyrnu, einnig frá Karólínu Leu.
Leikur Íslands og Norður-Írlands á Laugardalsvelli á þriðjudag hefst kl. 18:00. Miðasala er í fullum gangi á miðasöluvef KSÍ og leikurinn er einnig í beinni útsendingu á RÚV.
