16 þátttökuleyfi veitt á seinni fundi leyfisráðs
Seinni fundur leyfisráðs í leyfisferlinu fyrri keppnistímabilið 2013 fór fram föstudaginn 15. mars. Sextán félögum voru veitt þátttökuleyfi á fundinum, en átta félög höfðu fengið útgefin leyfi á fyrri fundi ráðsins mánudaginn 11. mars. Öll 24 félögin í efstu tveimur deildum karla hafa því fengið útgefin leyfi fyrir sumarið.
Á fundinum kynnti leyfisstjóri stöðu mála hjá félögunum 16 sem undirgangast leyfiskerfið og voru ekki afgreidd á fyrri fundi leyfisráðs þann 11. mars. Farið var yfir stöðu hvers félags um sig. Neðangreindum félögum voru veitt þátttökuleyfi:
- Pepsi-deild: Breiðablik, FH, Fram, Fylkir, ÍBV, Keflavík, Víkingur Ó og Þór.
- 1. deild: BÍ/Bolungarvík, KA, KF, Selfoss, Tindastóll, Víkingur R, Völsungur og Þróttur R.
Mannvirki
Stjórn KSÍ samþykkti aðlögunarfresti vegna mannvirkjaþátta til alls átta af ofangreindum félögum á fundi sínum fimmtudaginn 14. mars. Sá frestur sem hverju félagi var veittur miðaði við umfang þeirra framkvæmda sem ráðast þarf i til að keppnisvöllur þess félags uppfylli kröfur mannvirkjareglugerðar.
Félögin hafa því fengið þátttökuleyfi útgefið af leyfisráði, en leyfin eru veitt miðað við að gerðar verði úrbætur á mannvirkjum (áhorfendaaðstöðu og öðru þar sem við á) innan tiltekinna tímamarka. Þau tímamörk hafa verið kynnt félögunum. Þessi félög eru neðangreind:
- Fylkir vegna Fylkisvallar
- ÍBV vegna Hásteinsvallar
- Keflavík vegna Nettóvallarins
- Víkingur Ól. vegna Ólafsvíkurvallar
- Þór vegna Þórsvallar
- BÍ/Bolungarvík vegna Torfnesvallar
- KF vegna Ólafsfjarðarvallar
- Völsungur vegna Húsavíkurvallar
Þjálfaramenntun
ÍBV, KA, Selfoss og Þór voru minnt á að gæta að því að menntun aðstoðarþjálfara yngri flokka uppfylli settar kröfur.
FH og Þór voru minnt á að gæta að því að þjálfarar sæki nauðsynlega endurmenntun þar sem við á.
KF og Völsungur voru minnt á að gæta að því að menntun aðalþjálfara jafnt sem aðstoðarþjálfara yngri flokka uppfylli settar kröfur. Þessi félög undirgangast leyfiskerfið í fyrsta sinn og njóta því eins árs aðlögunarfrests.
Aðalþjálfari 4. flokks hjá Tindastóli uppfyllir ekki menntunarkröfur - er með 1. stig en þarf KSÍ-B. Málinu verður vísað til aga- og úrskurðarnefndar, sem ákveður viðurlög.
Dómgæsla og knattspyrnulögin
Enginn fulltrúi Fram sótti fund KSÍ um dómgæslu og knattspyrnulögin vor 2012 og enginn sambærilegur fundur var haldinn á vegum félagsins. Málinu verður vísað til aga- og úrskurðarnefndar, sem ákveður viðurlög.
Aðlögunarfrestur nýliða
Völsungur og KF eru nýliðar í leyfiskerfinu og eru því á eins árs aðlögun að þeim kröfum sem þar eru gerðar. Félögunum er bent á að fyrir keppnistímabilið 2014 þarf að vera tryggt að þau uppfylli allar lykilkröfur og hafa þau þegar lagt fram áætlanir sínar þess efnis, sem sýna hvernig kröfurnar verða uppfylltar og hvenær.
.jpg?proc=760)
.jpg?proc=760)
