UEFA CFM fjarnám í vikunni
Í vikunni fer fram 2. vinnulotan af þremur í UEFA CFM náminu sem nú er haldið í fyrsta sinn hjá KSÍ. Í þessari annarri vinnulotu verður fjallað um markaðsmál og samskiptamál.
UEFA CFM (UEFA Certificate in Football Management) er stjórnunarnám á vegum Knattspyrnusambands Evrópu fyrir einstaklinga sem starfa í knattspyrnuhreyfingunni eða tengjast henni með beinum hætti. Námið er á háskólastigi og hefur verið skipulagt af UEFA síðan árið 2010 í samstarfi við svissnesku námsstofnunina IDHEAP (The Swiss Graduate School of Public Administration, háskólinn í Lausanne).
Þátttakendur í UEFA CFM geta verið allt að 30 (að hámarki 20 frá Íslandi og að hámarki 10 erlendis frá). Auk íslenskra nemenda koma þátttakendur frá Skotlandi, Hvíta-Rússlandi, Danmörku, Finnlandi, Svíþjóð og Noregi.
Námið er að mestu rafrænt og fer allt fram á ensku (námsgögn, verkefni og fyrirlestrar). Í hefðbundinni útfærslu er rafræni hlutinn (e-learning) í 6 lotum (modules), og allajafna eru haldnar 3 vinnulotur (face-to-face seminars). Sú fyrsta var haldin í höfuðstöðvum KSÍ 5. og 6. mars. Önnur vinnulotan að þessu sinni verður eingöngu rafræn og í gegnum fjarfundarbúnað dagana 22. og 23. júlí. Síðasta vinnulotan var svo áætluð í nóvember, en hefur verið frestað til janúar.
Kennarar og fyrirlesarar eru tilnefndir af UEFA/IDHEAP og hafa allir mikla reynslu af því að starfa í alþjóðlegu umhverfi knattspyrnuhreyfingarinnar – hjá knattspyrnusamböndum, knattspyrnufélögum, og fyrirtækjum eða stofnunum með sterka tengingu við knattspyrnu. Náminu lýkur með útskrift í janúar 2020 að undangengnum skilum á tveimur skriflegum verkefnum og munnlegu lokaprófi.
.jpg?proc=760)
