Védís Hervör syngur þjóðsöngva Íslands og Skotlands
Védís Hervör Árnadóttir mun syngja þjóðsöngva Íslands og Skotlands fyrir viðureign þjóðanna í undankeppni HM 2010 á Laugardalsvelli á miðvikudag. Þessi glæsilega söngkona mun syngja án undirleiks, líkt og hún gerði fyrir vináttulandsleik Íslands og Wales í maí á þessu ári.
Þjóðsöng Íslands, lofsöng Matthíasar Jochumssonar, kunna allir og hefur þessi ættjarðarsöngur yljað mörgum um hjartaræturnar fyrir landsleiki á Laugardalsvellinum. Þjóðsöngur Skota heitir Flower of Scotland.
Í hálfleik mun síðan Einar Ágúst, sem gerði garðinn frægan með hljómsveitinni Skítamóral, leika nokkur lög til að halda uppi fjörinu. Einar Ágúst er frábær gítarleikari og söngvari og mun eflaust njóta þess að láta ljós sitt skína fyrir framan vallargesti á Laugardalsvelli.
