Aftur sigur gegn Skotum hjá U19 karla
U19 landslið karla gerði svo sannarlega góða ferð til Skotlands í vikunni, þar sem liðið lék tvo vináttuleiki við heimamenn, og kemur til baka til Íslands með tvo sigra í farteskinu. Fyrri leikurinn var á mánudag og þar vannst 2-0 sigur. Síðari leikurinn var svo í dag, miðvikudag, og aftur vannst sigur, að þessu sinni 3-1.
Pape Mamadou Faye náðy forystunni fyrir Ísland eftir 15 mínútna leik, en hann skoraði bæði mörkin í fyrri leiknum. Skotar voru þó ekki lengi að jafna og eftir aðeins þrjár mínútur lá knötturinn í neti íslenska liðsins. Okkar piltar voru sterkari aðilinn í leiknum og Arnar Sveinn Geirsson náði forystunni að nýju eftir 36 mínútur og þannig var staðan í hálfleik. Andri Fannar Stefánsson gulltryggði íslenskan sigur með marki úr vítaspyrnu á 86. mínútu.
Íslenska liðið lék mjög vel í báðum þessum leikjum og verður spennandi að fylgjast með þessum ungu og efnilegu leikmönnum í náinni framtíð.