Súpufundur KSÍ fer fram í hádeginu fimmtudaginn 8. apríl
Næsti súpufundur KSÍ verður haldinn fimmtudaginn 8. apríl. Óhætt er að segja að súpufundir KSÍ hafi farið vel af stað en yfir 90 manns mættu á fyrsta fundinn. Líkt og á fyrsta fundinum verður fyrirkomulagið 30 mínútna fyrirlestur og svör við spurningum. Jafnframt mun KSÍ bjóða gestum upp á súpu og brauð á þessum fyrirlestri og því upplagt að skella sér í heimsókn til KSÍ, hlýða á áhugavert erindi og fá sér hádegismat í leiðinni.
Að þessu sinni mun fyrirlesari á vegum SÁÁ koma og flytja erindi um spilafíkn og það hvernig þjálfarar og aðrir innan knattspyrnuhreyfingarinnar geti greint einkenni spilafíknar og hvert eigi að snúa sér í þeim málum. Fjárhættuspil leikmanna allt frá meistaraflokki og niður í yngri flokka hefur aukist mikið undanfarin ár og nú er svo komið að spilafíkn er vaxandi vandamál innan íþróttahreyfingarinnar.
Þessi annar fræðslufundur verður haldinn fimmtudaginn 8. apríl klukkan 12.15 á 3. hæð í höfuðstöðvum KSÍ við Laugardalsvöll.
Aðgangur er ókeypis og opinn öllum áhugasömum en þó þarf að skrá sig með því að senda tölvupóst á dagur@ksi.is og taka fram nafn, kennitölu og netfang.
.jpg?proc=760){kind=logo}