Víkingur og Breiðablik mætast í Meistarakeppni KSÍ á sunnudag
Meistarakeppni KSÍ í karlaflokki fer fram sunnudaginn 10. apríl, þar sem mætast Íslands- og bikarmeistarar Víkings annars vegar og Breiðablik hins vegar. Leikurinn fer fram á Víkingsvelli, hefst kl. 20:00 og er í beinni sjónvarpsútsendingu á Stöð 2 sport. Í Meistarakeppni KSÍ mætast alla jafna Íslands- og bikarmeistarar fyrra árs, en sé sama félag í senn Íslandsmeistari og bikarmeistari skulu Íslandsmeistararnir leika gegn liði því sem varð í öðru sæti efstu deildar. Í Meistarakeppni karla er keppt um Sigurðarbikarinn sem gefinn var af KR til minningar um Sigurð Halldórsson.
Ef jafnt verður eftir venjulegan leiktíma er ekki framlengt, heldur farið beint í vítaspyrnukeppni til að ákvarða sigurvegara.
Miðasala á leikinn er í gegnum Stubb-appið og miðaverð er kr. 2.200 fyrir 17 ára og eldri, frítt inn fyrir 16 ára og yngri, og frítt inn fyrir öryrkja.
.png?proc=760)
