Sigurður Ragnar Eyjólfsson þjálfari A landsliðs kvenna
Knattspyrnusamband Íslands hefur ráðið Sigurður Ragnar Eyjólfsson sem þjálfara A landsliðs kvenna og Guðna Kjartansson sem aðstoðarmann hans. Sigurður og Guðni munu stýra liðinu næstu tvö ár og stýra liðinu í næstu Evrópukeppni.
Sigurður Ragnar er íþróttafræðingur að mennt, og hefur Mastersgráðu í æfinga- og íþróttasálfræði frá Greensboro háskóla í Norður-Karólínu í Bandaríkjunum. Sigurður hefur leikið knattspyrnu erlendis sem atvinnumaður, m.a. með Walsall í 1. og 2. deild í Englandi og svo með Harelbeke í úrvalsdeildinni í Belgíu. Sigurður Ragnar er um þessar mundir að ljúka við UEFA A þjálfaragráðu hjá KSÍ. Þá hefur Sigurður Ragnar starfað sem fræðslustjóri KSÍ síðan í febrúar 2002 en eitt af hans aðal hlutverkum í því starfi hefur verið að byggja upp þjálfaramenntun á Íslandi fyrir hönd KSÍ. Sigurður Ragnar á einnig farsælan feril að baki sem leikmaður á Íslandi, en hann varð m.a. Íslandsmeistari með KR árin 2002 og 2003. Sigurður Ragnar hyggst freista þess að komast inn á UEFA Pro þjálfaranámskeið hjá enska knattspyrnusambandinu á næsta ári og vera þar með annar Íslendingurinn til að ljúka UEFA Pro þjálfaragráðu.
Guðni er íþróttakennari að mennt og er um þessar mundir að ljúka UEFA A þjálfaragráðu. Guðni er einn reynslumesti þjálfarinn í íslensku knattspyrnunni og hefur stjórnað flestum landsliðum Íslands, m.a. A-landsliði karla. Guðni hefur um árabil verið U-19 landsliðsþjálfari karla. Guðni hefur verið valinn íþróttamaður ársins og á að baki 31 A-landsleik sem leikmaður fyrir Ísland og var þar af fyrirliði í 7 leikjum.
Sigurður Ragnar og Guðni störfuðu m.a. saman á U-18 móti í Tékklandi síðastliðið sumar og stýrðu þar í sameiningu U-18 landsliði karla í 3 leikjum.
Næsta verkefni A landsliðs kvenna er undankeppni EM, en úrslitakeppnin fer fram í Finnlandi sumarið 2009. Að þessi sinni taka 12 lið þátt í úrslitakeppninni og er það markmið KSÍ að Ísland vinni sér sæti í þeirri keppni. Dregið verður í riðla 13. desember næstkomandi. Forkeppni fyrir riðlakeppnina hefur þegar farið fram og þau lið sem eftir standa (30) verða dregin í sex fimm liða riðla. Sigurvegarar riðlanna fara beint í úrslitakeppnina (6 lið), öll liðin í 2. sæti og þau fjögur lið sem ná bestum árangri í 3. sæti leika aukaleiki (heima og heiman) um sæti í úrslitakeppninni (5 lið). Gestgjafarnir, Finnar, fara beint í úrslitakeppnina (1).
Íslenska liðið er í styrkleikaflokki B og verður í riðli með einu liði úr A, C, D og E riðlum.
|
A Þýskaland Svíþjóð Noregur Danmörk England Frakkland |
B Rússland Ítalía Tékkland Ísland Úkraína Holland |
C Spánn Skotland Pólland Serbía Sviss Ungverjaland |
D Belgía Portúgal Hvíta-Rússland Írland Austurríki Grikkland |
E Slóvenía N-Írland Ísrael Slóvakía Rúmenía Wales |
KSÍ þakkar Jörundi Áka Sveinssyni og Elísabetu Gunnarsdóttur aðstoðarkonu hans fyrir góð störf og óskar þeim velfarnaðar.
