Landsliðið æfði á Rasunda vellinum
Íslenska landsliðið æfði í dag á rennisléttum Rasunda vellinum en á morgun etja þeir kappi þar við Svía. Aðstæður eru allar hinar bestu og var um 26 stiga hiti í Stokkhólmi í dag.
Leikinn ber upp á þjóðhátíðardag Svía en einnig hefur mikið verið um dýrðir af hálfu íslenska sendiráðsins í Stokkhólmi og verður töluverður fjöldi Íslendinga á vellinum þegar flautað verður til leiks.
Hópurinn sjálfur er í mjög góðu ástandi og hafa sjúkraþjálfarar og nuddarar liðsins haft óvenju lítið að gera að þessu sinni. Hinsvegar er búningastjórinn á fullu, nú sem endranær og sendi hann okkur þessa símamynd af æfingunni í dag.
Símamynd: Björn Ragnar Gunnarsson
