Frábær byrjun hjá U19 karla í Noregi
Íslenska U19 karlalandsliðið byrjaði frábærlega í milliriðli fyrir EM 2008 en riðillinn er leikinn í Noregi. Fyrsti leikurinn fór fram í dag og voru Norðmenn mótherjarnir að þessu sinni. Íslenska liðið gerði sér lítið fyrir og lagði heimamenn með þremur mörkum gegn tveimur. Staðan í hálfleik var 2-1 Íslendingum í vil.
Þetta er frábær byrjun hjá strákunum en heimamenn þóttu, fyrir keppnina, sigurstranglegir í riðlinum en efsta þjóðin tryggir sér sæti í úrslitakeppninni sem fer fram í júlí. Gylfi Þór Sigurðsson kom Íslendingum yfir á 24. mínútu en Norðmenn jöfnuðu á 42. mínútu. Guðmundur Reynir Gunnarsson kom Íslendingum yfir aðeins mínútu síðar og staðan þannig er flautað var til hálfleiks.
Í seinni hálfleik bætti hvort liðið við einu marki og var Guðmundur Reynir aftur á ferðinni fyrir Íslendinga. Kom hann Íslendingum í 3-1 á 64. mínútu en Norðmenn minnkuðu muninn á 69. mínútu. Baráttan var svo mikil síðustu 20 mínúturnar og strákarnir fögnuðu fræknum sigri vel í leikslok. Þeir verða aftur á ferðinni á þriðjudaginn þegar leikið verður gegn Ísrael. Í hinum leik dagsins í riðlinum léku Búlgaría og Ísrael og sigruðu Búlgarar með einu marki gegn engu.
Hægt er að sjá upptöku af leiknum með því að smella hér.
