Frækilegt jafntefli Íslendinga gegn Evrópumeisturum Þjóðverja
Keppni í riðlakeppni EM U17 kvenna hófst í dag og er fyrsti riðillinn leikinn hér á landi. Íslensku stelpurnar gerðu markalaust jafntefli við Evrópumeistara Þjóðverja á Vodafonevellinum á meðan Frakkar unnu stórsigur á Ísrael á KR vellinum.
Búist var við erfiðum leik fyrir íslensku stelpurnar í dag en þær vörðust vel í byrjun en gestirnir sóttu mikið í byrjun. Smám saman efldist sjálfstraust stelpnanna og þær fóru að færa sig framar á völlinn. Markalaust var í leikhléi og snemma í síðari hálfleik fékk islenska liðið líklega besta færi leiksins en það nýttist ekki. Meira jafnræði var með þjóðunum í síðari hálfleik þrátt fyrir að gestirnir væru meira með boltann. Okkar stelpur fögnuðu því vel þegar finnski dómarinn flautaði til leiksloka og gott stig í höfn gegn ríkjandi Evrópumeisturum.
Á KR velli gerðu Frakkar út um leikinn gegn Ísrael strax í byrjun og eftir 15 mínútna leik var staðan orðin 3 - 0 fyrir Frakka. Þær bættu svo tveimur mörkum við fyrir leikhléið. Frakkar voru áfram mun sterkari aðilinn í síðari hálfeik og mörkin urðu þrjú þá eða átta alls.
Á sunnudaginn eru svo næstu leikir riðilsins. Í Grindavík mætast Íslendingar og Frakkar og í Keflavík eigast við Þjóðverjar og Ísraelar. Báðir leikirnir hefjast kl. 13:00.
