Glæsilegur sigur á Norður Írum hjá U21 karla
Strákarnir í U21 liðinu unnu frábæran sigur á Norður Írum í dag en leikurinn var liður í undankeppni EM 2011. Lokatölur urðu 6 - 2 Íslendingum í vil eftir að staðan í hálfleik hafði verið 4 -0.
Leikurinn fór fram á Showgrounds vellinum í Coleraine og höfðu Íslendingar töglin og haldirnar í þessum leik frá upphafi. Bjarni Þór Viðarsson kom íslenska liðinu yfir með marki úr vítapspyrnu á 15. mínútu og Aron Einar Gunnarsson bætti við marki eftir um hálftíma leik. Á síðustu þremur mínútum fyrri hálfleiks gerðu strákarnir svo 2 mörk, fyrst Alfreð Finnbogason og síðan, fyrirliðinn, Rúrik Gíslason. Strákarnir gengu því með fjögurra marka forystu til leikhlés eftir ótrúlegan fyrri hálfleik.
Heldur jafnaðist leikurinn í síðari hálfleik en Jóhann Berg Guðmundsson bætti við fimmta markinu á 57. mínútu. Norður Írar minnkuðu muninn aðeins mínútu síðar en Rúrik skoraði sitt annað mark og sjötta mark Íslendinga á 64. mínútu. Heimamenn skoruðu sitt annað mark og síðasta mark leiksins á 76. mínútu og fleiri urðu mörkin ekki í leiknum og glæsilegur sigur hjá strákunum í höfn.
Í sama riðli áttust einnig við Þjóðverjar og Tékkar og var leikið í Þýskalandi. Gestirnir gerðu sér lítið fyrir og lögðu Þjóðverja, 1 - 2 og hafa Tékkar unnið alla fjóra leiki sína til þessa í riðlinum. Þjóðverjar og Íslendingar koma svo næstir með þrjú stig eftir 2 leiki.
