Árlegur dagur baráttu gegn kynferðislegri misneytingu barna
Evrópuráðið hefur tekið ákvörðun um að helga 18. nóvember ár hvert baráttu gegn kynferðislegu ofbeldi og kynferðislegri misneytingu barna og eru aðildarríki Evrópuráðsins hvött til að festa daginn í sessi. Tilgangurinn er að stuðla að aukinni umræðu og samfélagsvitund um kynferðislegt ofbeldi gegn börnum og að kynna samning Evrópuráðsins um vernd barna gegn kynferðislegri misneytingu og kynferðisofbeldi, svonefndan Lanzarote samning. Samningurinn er heildstæðasta og víðtækasta alþjóðasamþykkt sem gerð hefur verið um vernd barna gegn kynferðisofbeldi. Ísland undirritaði Lanzarote samninginn árið 2008 og fullgilti hann árið 2012.
Evrópuráðið gaf í tilefni dagsins út teiknimynd sem er um 3 mínútur að lengd og var unnin í samráði við hóp barna. Myndin er með einföldum og aðgengilegum boðskap fyrir börn á aldrinum 9-13 ára. Börn eru hvött til þess að leita til einhvers sem þau treysta ef þau eða einhver sem þau þekkja hefur verið eða er beittur ofbeldi. Myndin er aðgengileg á vefsíðum velferðarráðuneytis, Barnaverndarstofu og umboðsmanns barna.
Stýrihópur ráðuneyta velferðar, innanríkis og mennta- og menningarmála um aðgerðir gegn ofbeldi og afleiðingum þess hafa farið þess á leit við grunnskóla, stofnanir og félagasamtök að vekja athygli á forvörnum gegn kynferðislegu ofbeldi.
Barnaverndarstofa og umboðsmaður barna hvetja til þess að myndin verði sýnd sem víðast. Þannig stuðlum við að aukinni umræðu og samfélagsvitund um kynferðislegt ofbeldi.
ÍSÍ gaf út bækling um forvarnir gegn kynferðislegu ofbeldi í íþróttum haustið 2013. Þar er m.a. fjallað um líkamlega snertingu, fullorðna sem fyrirmyndir, siðareglur félaga, viðbrögð við áfalli og ráðgjöf varðandi kynferðislegt ofbeldi á börnum.
.jpg?proc=760)
