• fim. 04. apr. 2019
• Fræðsla

Fræðsla fyrir barna- og unglingaráð knattspyrnufélaga

KSÍ býður barna- og unglingaráðum aðildarfélaga að fá til sín fyrirlesara sem mun fjalla um helstu verkefni og hlutverk ráðanna. Þar má nefna hlutverk yfirþjálfara og samvinnu hans við aðra þjálfara, stefnu og menningu í félögum og úrvinnslu erfiðra eða viðkvæmra mála. Rætt er um mótafyrirkomulag, hvernig þjálfarar skipta í lið í yngri flokkunum, hvernig æfingar eru uppbyggðar og fleira sem gagnast þeim sem eru í framvarðasveit knattspyrnufélaga. 

Fyrirlesarinn er Daði Rafnsson, sem hefur áralanga reynslu af barna- og unglingaþjálfun. Daði stundar doktorsnám, kennir við HR og kennir jafnframt á námskeiðum KSÍ, en var áður yfirþjálfari hjá Breiðabliki og aðstoðarþjálfari hjá Jiangsu Suning í atvinnumannadeild kvenna í Kína.

Þessi fræðsla er ókeypis fyrir aðildafélögin. Áhugasamir eru hvattir til að hafa samband við Arnar Bill Gunnarsson, fræðslustjóra KSÍ, fyrir frekari upplýsingar eða til að bóka heimsókn frá Daða.

• Fræðsla