Hópurinn fyrir mars-leiki í undankeppni EM 2024
A landslið karla leikur fyrstu leiki sína í undankeppni EM 2024 síðar í mánuðinum. Mótherjarnir eru Bosnía-Hersegóvína og Liechtenstein og eru báðir leikirnir í beinni útsendingu á Viaplay. Önnur lið í riðlinum eru Lúxemborg, Slóvakía og Portúgal.
Íslenska liðið hefur ekki áður mætt Bosníu-Hersegóvínu en hefur mætt Liechtenstein 9 sinnum (6 sigrar, 2 jafntefli, 1 tap).
Skoða fyrri viðureignir við Liechtenstein
Leikirnir:
Fimmtudagur 23. mars kl. 19:45 (ísl. tími)
Bilino Polje Stadium, Zenica
Bosnía-Hersegóvína – Ísland
Beint á Viaplay
Sunnudagur 26. mars kl. 16:00 (ísl. tími)
Rheinpark Stadion, Vaduz
Liechtenstein – Ísland
Beint á Viaplay
Hér að neðan má finna hlekk beint inn á síðu VIaplay þar sem hægt er að kaupa áskrift:
Undankeppni EM 2024
Arnar Þór Viðarsson, þjálfari A landsliðs karla, hefur valið leikmannahóp Íslands fyrir leikina tvo.
Hópurinn
Patrik Sigurður Gunnarsson - Viking FK - 3 leikir
Rúnar Alex Rúnarsson - Alanyaspor - 20 leikir
Elías Rafn Ólafsson - FC Midtjylland - 4 leikir**
Daníel Leó Grétarsson - Slask Wroclaw - 12 leikir
Aron Einar Gunnarsson - Al Arabi - 100 leikir, 2 mörk
Sverrir Ingi Ingason - PAOK - 40 leikir, 3 mörk*
Aron Elís Þrándarson - OB Odense - 17 leikir, 1 mark
Hörður Björgvin Magnússon - Panathinaikos - 44 leikir, 2 mörk
Davíð Kristján Ólafsson - Kalmar FF - 13 leikir
Guðlaugur Victor Pálsson - D.C. United - 32 leikir, 1 mark
Alfons Sampsted - FC Twente - 14 leikir
Mikael Neville Anderson - AGF - 18 leikir, 2 mörk
Ísak Bergmann Jóhannesson - FC Copenhagen - 17 leikir, 3 mörk
Hákon Arnar Haraldsson - FC Copenhagen - 7 leikir
Þórir Jóhann Helgason - US Lecce - 16 leikir, 2 mörk
Arnór Ingvi Traustason - IFK Norrköping - 45 leikir, 5 mörk
Stefán Teitur Þórðarson - Silkeborg IF - 15 leikir, 1 mark
Arnór Sigurðsson - IFK Norrköping - 25 leikir, 2 mörk
Jón Dagur Þorsteinsson - OH Leuven - 24 leikir, 4 mörk
Mikael Egill Ellertsson - Venezia FC - 10 leikir
Jóhann Berg Guðmundsson - Burnley FC - 82 leikir, 8 mörk
Alfreð Finnbogason - Lyngby BK - 63 leikir, 15 mörk
Andri Lucas Guðjohnsen - IFK Norrköping - 13 leikir, 3 mörk
Sævar Atli Magnússon - Lyngby BK - 2 leikir
Leikmenn til vara:
Hjörtur Hermannsson - AC Pisa - 25 leikir, 1 mark
Guðmundur Þórarinsson - OFI - 12 leikir*
Dagur Dan Þórhallsson - Orlando City - 4 leikir
Nökkvi Þeyr Þórisson - Beerschot - 1 leikur
Sveinn Aron Guðjohnsen - Elfsborg - 19 leikir, 2 mörk
*Breyting 17. mars - Guðmundur Þórarinsson inn fyrir Sverri Inga Ingason.
**Breyting 21. mars - Hákon Rafn Valdimarsson inn fyrir Elías Rafn Ólafsson.
Samskiptadeild KSÍ lagði nokkrar spurningar fyrir Arnar Þór, um hópinn og verkefnið.
Albert Guðmundsson hefur verið að spila vel á Ítalíu. Hann er ekki í hópnum að þessu sinni. Ræddirðu við Albert?
Ég hringdi í Albert og við ræddum saman. Niðurstaðan er sú að ég vel hann ekki að þessu sinni. Það eru vonbrigði að hann sé ekki tilbúinn til að koma inn í landsliðið á forsendum liðsins. Þessar forsendur eru þær sömu fyrir alla leikmenn, hvort sem þú ert 19 ára eða 34 ára. Það er fullt af leikmönnum með mikla hæfileika í þessum landsliðshópi. Akkúrat núna er marsverkefnið okkar framundan, ný undankeppni að byrja, og þá er mikilvægt að vera með fókus á það verkefni og þann hóp sem við erum með. Það ætlum við að gera, ég og þjálfarateymið, starfsliðið og leikmennirnir, allir saman sem eitt lið.
Birkir Bjarnason, leikjahæsti leikmaður A landsliðs karla frá upphafi er ekki í hópnum. Hvers vegna?
Við Birkir ræddum auðvitað saman. Hann er í svolítið erfiðri stöðu hjá sínu félagsliði í Tyrklandi, er að spila lítið, miklu minna en hann vonaðist eftir, og er að reyna að losna frá félaginu en það hefur tekið tíma. Vegna þeirrar stöðu sem hann er í þá vorum við sammála um að hann yrði ekki með að þessu sinni. Birkir er leikjahæsti leikmaður Íslands frá upphafi og hefur enn mikið fram að færa, mikla og ómetanlega reynslu sem nýtist liðinu bæði innan og utan vallar, og hann er þannig leikmaður og karakter að hann setur hagsmuni landsliðsins fram yfir sína eigin.
Ef við ræðum nú aðeins þá sem eru í hópnum, þá eru margir af þeim leikmönnum að spila vel með sínum félagsliðum. Það hlýtur að gleðja landsliðsþjálfarann?
Svo sannarlega. Það væri auðvitað hægt að nefna marga, en til að nefna einhverja þá er t.d. Rúnar Alex að spila vel í Tyrklandi og var valinn besti markvörður umferðarinnar nýlega. Arnór Sig og Arnór Ingvi eru að gera flotta hluti í Svíþjóð. Ofsalega gaman að sjá Alfreð Finnboga koma til baka og sjá leikgleðina skína hjá honum. Jói Berg er að spila mjög vel með Burnley. Hörður Björgvin og Sverrir eru lykilmenn í toppliðum í Grikklandi. Jón Dagur í Belgíu, Hákon í Kaupmannahöfn. Og fleiri. Það eru margir að spila mikið, spila vel og njóta sín, sem er ekki síður mikilvægt. Ég hlakka mikið til að vinna með þessu hópi í komandi verkefni.
Loks að komandi verkefni. Hverju megum við búast við?
Við viljum auðvitað taka sem flest stig í þessum glugga, eins og öllum gluggum. Leikurinn í Bosníu verður hörkuleikur. Við eigum að vinna Liechtenstein og ætlum að gera það, en það má samt ekki vanmeta nein lið og taka því sem sjálfsögðum hlut að menn vinni án þess að þurfa að hafa fyrir því, þá getur farið illa. Bosnía er allt annað dæmi, þetta er hörkulið sem vann sinn riðil í Þjóðardeildinni á síðasta ári, og með hörku mannskap, það má ekki gleyma því. Góð frammistaða í þeim leik getur skilað okkur stigi eða stigum. Við byrjum í Bosníu og setjum allan fókus og alla orku í þann leik til að byrja með.
.jpg?proc=760)
