Tap hjá U17 kvenna gegn Dönum
Íslensku stelpurnar í U17 kvenna biðu lægri hlut gegn stöllum sínum frá Danmörku í öðrum leik liðsins í milliriðli fyrir EM 2008. Lokatölur urðu 4-2 fyrir Dani eftir að staðan í hálfleik hafði verið 1-1.
Milliriðillinn er leikinn í Danmörku og í fyrri leik dagsins sigruðu Finnar Rússa með einu marki gegn engu.
Heimstúlkur komust yfir í fyrri hálfleik en Arna Sif Ásgrímsdóttir jafnaði metin á 26. mínútu. Danir komust svo 3-1 yfir í síðari hálfleik en stelpurnar gáfust ekki upp. Berglind Þorvaldsdóttir minnkaði muninn sjö mínútum fyrir leikslok. Stelpurnar freistuðu þess að jafna metin og lögðu allt í sókina. Það nýttu Danir sér á lokamínútunni og bættu fjórða markinu við.
Síðasti leikur stelpnanna er gegn Finnum á laugardaginn en efsta lið riðilsins kemst áfram í úrslitakeppnina sem leikin verður í Sviss.
.jpg?proc=760)
