Dómarasamstarf við enska knattspyrnusambandið
Enski dómarinn James Adcock mun á næstu dögum starfa á þremur leikjum í íslensku deildar keppninni. Hann mun dæma leik Selfoss og ÍR í kvöld og sömuleiðis dæmir hann leik ÍA og Leiknis sem fer fram 12. júlí. Báðir þessir leikir eru í 1. deild karla og einnig verður hann aðstoðardómari á leik Breiðabliks og Þórs í Pepsi-deild karla 9. júlí.
Þessi verkefni er liður í samstarfsverkefni á milli Knattspyrnusambanda Íslands og Englands en síðar á árinu munu íslenskir dómarar fara til Englands í sömu erindagjörðum.
James Adcock er 27 ára gamall og hefur verið að dæma í neðri deildum í Englandi en mun dæma í hinni stórskemmtilegu Championship deild á næsta keppnistímabili sem er næst efsta deild þar í landi.
