Ljóst hvaða lið mætast í undanúrslitum Mjólkurbikarsins
Dregið var í undanúrslit Mjólkurbikars karla og kvenna í höfuðstöðvum KSÍ í dag, mánudag. Að venju voru fulltrúar liðanna sem leika í undanúrslitum mættir, ásamt fulltrúum fjölmiðla, KSÍ og MS. Atli Eðvaldsson, fyrrverandi landsliðsfyrirliði og landsliðsþjálfari, aðstoðaði Birki Sveinsson, mótastjóra KSÍ, við framkvæmd dráttarins.
Í Mjólkurbikar kvenna drógust saman annars vegar Fylkir og Selfoss sem munu leika á Jáverk-vellinum á Selfossi, en hins vegar KR og Þór/KA, sem mætast á Meistaravöllum í Reykjavík.
Undanúrslitaleikir Mjólkurbikars karla verða þannig að KR-ingar sækja FH-inga heim í Kaplakrikann í Hafnarfirði, og Víkingar fá Breiðablik í heimsókn í Víkina.
