Knattspyrnulögin uppfærð á vef KSÍ
Knattspyrnulögin hafa verið uppfærð á vef KSÍ eftir breytingar sem samþykktar voru á fundi stjórnar þann 18. mars síðastliðinn. Um er að ræða breytingar á eftirtöldum greinum:
- 1. grein - Leikvöllurinn
- 7. grein - Leiktíminn
- 11. grein - Rangstaða
- 12. grein - Leikbrot og óviðeigandi hegðun - boltinn handleikinn
Smellið á hlekkinn hér að neðan til að skoða knattspyrnulögin 2020-2021 ásamt breytingum á þeim 2021-2022 og ítarefni þeim tengt. Breytingarnar hafa þegar tekið gildi á Íslandi.
Breytingar á einstökum greinum eru eftirfarandi, en öllum ákvæðum sem tengjast VAR er sleppt hér til einföldunar:
1. grein - Leikvöllurinn
Markstangirnar og markslárnar (og bæði mörkin) verða að vera sömu lögunar.
7. grein - Leiktíminn
Ákvæði um viðbótartíma á við um ,,tapaðan" leiktíma.
11. grein - Rangstaða
Bætt er við skilgreiningunni úr 12. greininni um hvað teljist til handleggsins (frá neðri mörkum handakrikans) til að nota við mat á rang- og réttstöðu.
12. grein - Leikbrot og óviðeigandi hegðun - boltinn handleikinn
Ekki skal meta sérhverja snertingu handar/handleggs við boltann sem leikbrot.
Meta skal stöðu handar/handleggs leikmannsins í samhengi við hreyfingu líkama hans í hverju tilfelli fyrir sig.
Óviljandi hendi sóknarmanns sem hrekkur til samherja og skapar þannig marktækifæri er ekki lengur refsiverð.
Noti leikmaður viljandi bragð til þess að komast í kringum lögin við að leika boltanum til markvarðar svo hann geti handleikið hann er nú einnig refsivert við töku markspyrna. Upphafsmaðurinn skal áminntur (gult spjald).
Vítaspyrna getur einungis verið dæmd fyrir brot gegn sérhverjum þeirra sem skráðir eru á leikskýrsluna (leikmönnum eða forráðamönnum).
Mynd með grein: Hafliði Breiðfjörð, Fótbolti.net
