A kvenna - Dregið í Þjóðadeild UEFA 2. maí
Dregið verður í Þjóðadeild UEFA hjá A kvenna 2. maí næstkomandi.
Þetta verður í fyrsta sinn sem keppt verður með Þjóðadeildarfyrirkomulagi kvennamegin, en það hefur verið gert karlamegin frá árinu 2018. Drátturinn fer fram í Nyon 2. maí og hefst hann kl. 11:00 að íslenskum tíma.
Þjóðum verður skipt niður í þrjár deildir, A, B og C. Í A deild verða 16 lið, en raðað verður í B og C deild eftir því hversu margar þjóðir taka þátt. Fyrir fyrstu útgáfu keppninnar verður farið eftir styrkleikalista UEFA. Ísland er þar í 12. sæti og verður því í þriðja styrkleikaflokki í A deild. Þau lið sem enda í fjórum efstu sætum A deildar fara áfram í undanúrslit Þjóðadeildarinnar og þau lið sem enda í neðsta sæti síns riðils falla niður í B deild. Í úrslitakeppni Þjóðadeildarinnar keppa þjóðirnar einnig um þau tvö sæti sem eru laus hjá UEFA fyrir Ólympíuleikana í París 2024. Þau lið sem komast í úrslitaleikinn tryggja sér farseðil til Parísar, en takist Frakklandi að komast í úrslitaleikinn þá gefur þriðja sætið farseðil til Parísar.
Þjóðadeildin verður leikin haustið 2023, en árið 2024 hefst undankeppni EM 2025. Hún verður einnig leikin með Þjóðadeildarfyrirkomulagi og því mikilvægt að vera í A deild þegar kemur að sjálfri undankeppninni í ljósi þess að þau lið sem verða þar eru amk örugg með sæti í umspili fyrir EM 2025. Þau lið sem enda í efstu tveimur sætum síns riðils í A deild komast beint í lokakeppni EM 2025 ásamt þeim sjö liðum sem komast í gegnum umspilið, en það fer fram að undankeppninni lokinni.
Hægt er að lesa frekar um Þjóðadeildina, undankeppni EM 2025 og EM 2025 á vef UEFA.
.jpg?proc=760)
