Skiladagur leyfisgagna er á fimmtudag
Fimmtudagurinn 15. janúar er stór skiladagur gagna í leyfiskerfinu, en þá skila leyfisumsækjendur þeim fylgigögnum með leyfisumsókn sem snúa að öðrum þáttum en fjárhagslegum. Þetta eru mannvirkjaþættir, starfsfólk og stjórnun, lagalegir þættir og knattspyrnulegir þættir. Leyfiskerfið nær sem kunnugt er til félaga í efstu tveimur deildum karla.
Meðal þeirra gagna sem er skilað eru samningar þjálfara og annarra lykilstarfsmanna, staðfestingar á mannvirkjaframkvæmdum, uppeldisáætlun ungra leikmanna, lagalegar staðfestingar, o.fl.
Þau félög sem þegar hafa skilað þegar þetta er ritað, um hádegisbil í dag, miðvikudag, eru Valur, KA, Keflavík, Stjarnan, Víkingur Ó, Þór og FH.
Í leyfishandbók kemur eftirfarandi fram um þau viðurlög sem skal beita ef tímamörk eru ekki virt við skil á leyfisgögnum:
2.2.3.2 Tímamörk ekki uppfyllt
Ef leyfisumsækjandi uppfyllir ekki sett tímamörk um framlagningu leyfisgagna skal hann sæta viðurlögum. Við ákvörðun þeirra skal taka mið af alvarleika brotsins. Eftirfarandi viðurlögum er hægt að beita:
1) Viðvörun og sekt; við fyrsta brot skal beita dagsektum að upphæð kr 1.500 fyrir hvern dag sem líður þangað til viðeigandi gögnum hefur verið skilað, að hámarki kr 30.000.
2) Áminning og sekt; við ítrekað brot skal skal beita dagsektum að upphæð kr 3.000 fyrir hvern dag sem líður þangað til viðeigandi gögnum hefur verið skilað, að hámarki kr 60.000.
3) Stigatap; við alvarlegt og ítrekað brot er jafnframt heimilt að draga allt að 3 stig frá félaginu í deildarkeppninni.
Ítrekunarkvöð fellur niður ef tímamörk hafa verið uppfyllt í 3 ár samfleytt.
.jpg?proc=760)
