Léku golf í Hvaleyrarholti
Leikmenn A-landsliðs karla léku golf á Hvaleyrarholtsvelli á sunnudag til að stytta sér stundir og þjappa hópnum saman fyrir leikinn gegn Möltu á Laugardalsvelli á miðvikudag.
Að sögn viðstaddra var geta leikmanna á hinum ýmsu stigum og ljóst þótti að sumir í hópnum hefðu aldrei átt að fá golfkylfu í hönd.
Almennt þóttu þó tveir ráshópar bera af í leikni með kylfurnar og eru þeir á myndinni hér til hliðar ásamt Brynju Þórhallsdóttur (með boltann) og Hrefnu Helgadóttur, sem starfa í klúbbhúsinu hjá Golfklúbbnum Keili.
Leikmennirnir eru (frá vinstri):
Eiður Smári Guðjohnsen, Arnar Þór Viðarsson, Grétar Rafn Steinsson, Brynjar Björn Gunnarsson, Helgi Valur Daníelsson, Kristján Finnbogason og Tryggvi Guðmundsson.
Þessir tveir ráshópar voru réttilega nefndir "Tiger-hóparnir".