mið. 22. apr. 2020
Mótamál
COVID-19

Íþróttastarf eftir 4. maí

Á þriðjudag birti heilbrigðisráðherra nýja auglýsingu um "takmörkun á samkomum vegna farsóttar", sem tekur gildi 4. maí 2020 kl. 00.00 og gildir til 1. júní 2020 kl. 23.59. Markmið takmörkunarinnar er sem fyrr að hægja eins og unnt er á útbreiðslu COVID-19 sjúkdómsins. Takmörkunin og þörf á henni verður endurmetin eftir því sem efni standa til, þ.e. hvort unnt sé að aflétta henni fyrr eða hvort þörf sé á að framlengja gildistíma hennar. Takmörkun á samkomum nær til landsins alls.

KSÍ hvetur knattspyrnuheyfinguna til að kynna sér gögnin vandlega og halda áfram að fylgja fyrirmælum yfirvalda í einu og öllu.

Fjallað er um skipulagt íþróttastarf í 6. grein auglýsingar um takmörkun á samkomum vegna farsóttar.

6. gr. - Skipulagt íþróttastarf.

Æfingar og keppnir skipulagðs íþróttastarfs eru heimilar án áhorfenda með þeim takmörkunum sem greinir í 6. gr.
Í skipulögðu íþróttastarfi skulu snertingar vera óheimilar og halda skal 2 metra bili á milli einstaklinga. Notkun á sameiginlegum búnaði, einkum þeim sem snertur er með höndum, skal haldið í lágmarki og ber að sótthreinsa hann á milli notkunar.
Óheimilt er að nota búningsklefa, sturtuklefa og aðra inniaðstöðu en íþróttasal og salernisaðstöðu.
Við skipulagt íþróttastarf innandyra mega ekki fleiri en fjórir einstaklingar æfa eða leika saman í einu rými, sem skal vera a.m.k. 800 m².
Við skipulagt íþróttastarf utandyra mega ekki fleiri en sjö einstaklingar æfa eða leika saman í hópi. Séu fleiri hópar við æfingar á sama svæði skal miða við að hver hópur hafi um 2.000 m² til umráða.
Þrátt fyrir ákvæði 3.-5. mgr. eru sundæfingar heimilar fyrir allt að sjö manns í einu, hvort sem er inni eða úti, og notkun búnings- og sturtuaðstöðu eftir því sem þörf krefur.

Í minnisblaði sóttvarnalæknis til heilbrigðisráðherra varðandi afléttingu samkomutakmarkana er fjallað um íþróttastarf barna annars vegar og fullorðinna hins vegar.

Íþrótta- og æskulýðsstarf barna á leik- og grunnskólastigi:

Engar fjöldatakmarkanir verða settar á iðkendur.
Öll íþrótta- og æskulýðsstarfsemi, inni og úti, verði leyfð.
Skíðasvæði verði opin fyrir æfingar barna og unglinga.
Sundlaugar, búnings- og sundaðstaða verði opin fyrir sundæfingar barna og unglinga.
Keppni í íþróttum barna á leik- og grunnskólastigi verði heimil án áhorfenda.
Hvatt verði til sérstaks hreinlætis og handþvottar.
Tveggja metra nándarreglan verði virt eins og hægt er.

Íþróttastarf fullorðinna:

Mest verði sjö einstaklingar með þjálfara á útisvæði sem miðast við hálfan fótboltavöll.
Mest verði fjórir einstaklingar með þjálfara á innisvæði sem miðast við handboltavöll.
Notkun búningsaðstöðu innanhúss verði óheimil.
Hvatt verði til að tveggjametra nándarreglan verði virt.
Keppni í íþróttum fullorðinna verði óheimil nema ef hægt sé að uppfylla skilyrði um tveggja metra nándarreglu og að keppni sé án áhorfenda.
Sundæfingar fyrir fullorðna verði að hámarki fyrir sjö einstaklinga. Notkun búnings- og sturtuaðstöðu verði leyfð.
Áfram verði hvatt til sérstaks hreinlætis, handþvottar og notkunar handspritts.