Framlengdur umsóknarfrestur um stöðu framkvæmdastjóra KSÍ
Á fundi stjórnar KSÍ í dag, miðvikudag, var rætt um stöðu framkvæmdastjóra KSÍ og umsóknir um starfið. Stjórnin samþykkti að framlengja umsóknarfrest um eina viku, þ.e. til og með 6. mars næstkomandi til að gefa svigrúm til að undirbúa ráðningarferlið sem best og skipaði stjórnin jafnframt ráðningarnefnd undir forystu formanns KSÍ til að meta allar umsóknir með hliðsjón af skorkorti. Ráðningarnefnd mun síðan hafa umsjón með viðtölum við umsækjendur og að lokum gera tillögu um ráðningu til stjórnar.
Þá samþykkti stjórn að Jörundur Áki Sveinsson sviðsstjóri knattspyrnusviðs taki tímabundið við stöðu framkvæmdastjóra og gegni því starfi með sérstöku stjórnendateymi sér við hlið - þeim Birki Sveinssyni mótastjóra, Bryndísi Einarsdóttur fjármálastjóra og Ómari Smárasyni samskiptastjóra. Klara Bjartmarz, fráfarandi framkvæmdastjóri KSÍ, verður stjórnendateyminu til ráðgjafar eins og þurfa þykir og við verður komið.
-----
Starf framkvæmdastjóra KSÍ laust til umsóknar
Knattspyrnusamband Íslands (KSÍ) óskar eftir að ráða framkvæmdastjóra til starfa á skrifstofu sambandsins. Opið er fyrir umsóknir til og með miðvikudagsins 6. mars.
Framkvæmdastjóri KSÍ annast daglegan rekstur sambandsins, undirbúning verkefna og áætlanagerð og er yfirmaður starfsmanna sem ráðnir eru til KSÍ. Framkvæmdastjórinn framfylgir stefnu stjórnar KSÍ, skal uppfylla sömu hæfisskilyrði og stjórnarmenn, og skal haga störfum sínum í samræmi við ákvæði laga og reglugerða er varða starfsemi knattspyrnusambandsins.
Menntun – Hæfi – Reynsla
- Þekking á íslenskri knattspyrnu.
- Háskólamenntun sem nýtist í starfi.
- Skipulögð og sjálfstæð vinnubrögð, geta til að vinna undir álagi.
- Leiðtogahæfileikar, reynsla af rekstri og stjórnun (mannaforráð) og hæfni í mannlegum samskiptum.
- Góð tölvukunnátta og þekking á helsta hugbúnaði.
- Góð tungumálakunnátta.
Umsóknir sendist á umsokn@ksi.is.
